Hvað vill Guð með mitt líf? Hvert stefnir líf mitt? Er biblían orð Guðs?

Þetta eru algengar spurningar sem allir spyrja sig einhvern tíman á lífsleiðinni. Hvað get ég gert? MCI er 9 mánaða skóli þar sem þú færð tíma til að leita Guðs og dvelja í návist hans, móta þinn eigin karakter, kynnast öðrum ungum einstaklingum á þínum aldri sem eru með sama hugarfari og þú og prófa ýmsa hluti sem þú hefur ekki einu sinni látið þig dreyma um að gera. Skólinn er fyrir ungt fólk á aldrinum 16-30 ára sem er tilbúið til að leggja upp í ferðalag lífs síns.

Markmið skólans er að gefa ungu fólki tækifæri til að þroskast og eflast í trúnni, sem og að verða meðvitaðari um daglegt líf með Guði. Einnig mun nemandinn kynnast hinum ýmsu starfsvettvöngum kirkjunnar en þar er ávallt af nógu að taka. Bóklega námið er byggt upp á kennslubókum í Guðfræði sem eru í nokkrum þyngdarstigum og getur hver fyrir sig valið sitt þyngdarþrep. Mikið er lagt upp úr verklega hluta skólans og að hver og einn fái að reyna sem flest, allt frá því að sópa gólf upp í það að prédika Guðs orð. Á hverju ári er farin a.m.k. ein trúboðsferð til fjarlægs lands þar sem nemandinn fær að kynnast ólíkri menning og lifnaðarháttum sem og sjá hvernig kristniboð fer fram í því landi.